အမျိုးသမီးတွေအပေါ်မှာ အများဆုံး သက်ရောက်တဲ့ ကျား-မ အခြေပြု အကြမ်းဖက်မှု

• အမျိုးသမီးတွေနဲ့ မိန်းကလေးငယ်တွေအပေါ် အကြမ်းဖက်မှုကို လိင်ပိုင်းဆိုင်ရာ၊ ရုပ်ပိုင်းဆိုင်ရာ၊ စိတ်ခံစားမှုပိုင်းဆိုင်ရာနဲ့ စီးပွားရေးဆိုင်ရာ အကြမ်းဖက်မှု စတဲ့ အသွင်သဏ္ဍန် မျိုးစုံနဲ့ တွေ့မြင်နိုင်ပါတယ်။

ဥပမာ – အိမ်တွင်းအကြမ်းဖက်မှု၊ မုဒိန်းမှု၊ အလိုမတူဘဲ လိင်ဆက်ဆံမှု၊ ခြိမ်းခြောက်မှု၊ ကာယိန္ဒြေနှောက်ယှက်မှု နဲ့ လူကုန်ကူးခံရမှုတွေပဲဖြစ်ပါတယ်။

ရံဖန်ရံခါ အမျိုးသမီးနဲ့ မိန်းကလေးငယ်တွေအပေါ် အကြမ်းဖက် ကျူးလွန်သူတွေက သူမရဲ့ ခင်ပွန်း၊ ဆွေမျိုးသားချင်း၊ ဆရာ/ဆရာမ နှင့် အပေါင်းအဖော်တွေ ဖြစ်နေတတ်ပါတယ်။

အမျိုးသမီးများ အကြမ်းဖက်ခံနေရခြင်းအပေါ် ရိုးရာယဉ်ကျေးမှု ထုံတမ်းအစဉ်အလာနှင့်ချိန်ထိုးပြီး မှန်ကန်၊ တရားမျှတကြောင်း ပြလို့မရပါဘူး။

အမျိုးသမီးများနှင့် မိန်းကလေးငယ်များ အကြမ်းဖက်ခံရခြင်းသည် လူမသိ သူမသိဖြစ်ပွားနေသော အရေးပေါ်ဆောင်ရွက်ရမည့် ကိစ္စရပ်ဖြစ်ပါတယ်။

• ကမ္ဘာအနှံ့အပြားမှာ အမျိုးသမီး ၃ ဦးလျှင် ၁ ဦးမှာ အကြမ်းဖက်ခံနေရလျက်ရှိပါတယ်။

• အိမ်တွင်းအကြမ်းဖက်မှုကို ထုတ်ဖော်ပြောဆိုဖို့ မလွယ်ကူပါဘူး။ အမျိုးသမီး အများစုက လူမသိ သူမသိ တိတ်တဆိတ် အကြမ်းဖက်ခံနေရဆဲပါ။ သင်လည်း အကြမ်းဖက်ခံနေရသူထဲက တစ်ယောက်ဖြစ်နေတယ်ဆိုရင် ဒါဟာသင် တစ်ယောက်တည်း မဟုတ်ဘူးဆိုတာ သိထားပါ။

တရားမျှတမှု နဲ့ အကူအညီရယူဖို့ ရှက်ရွံ့စိုးရိမ်ကြတဲ့အတွက် အမျိုးသမီးအများစုဟာ ကျား-မ အခြေပြု အကြမ်းဖက်မှု ဖြစ်ရပ် အတော်များများကို သက်ဆိုင်ရာဌာနသို့ သွားရောက် တိုင်တန်းခြင်း မပြုကြပါဘူး။

ကျား-မအခြေပြု အကြမ်းဖက်ခံရမှု၏ နောက်ဆက်တွဲ အကျိုးဆက်များဖြစ်တဲ့

• လိင်ပိုင်းဆိုင်ရာ အကြမ်းဖက်မှုက အမျိုးသမီးများရဲ့ ကျန်းမာရေးကို အကြီးအကျယ် ထိခိုက်နစ်နာစေပါတယ်။ အကြမ်းဖက်မှုကြောင့် အမျိုးသမီးတွေ လိင်မှတစ်ဆင့် ကူးစက်တဲ့ ရောဂါရရှိနိုင်တယ်။ မလိုလားတဲ့ ကိုယ်ဝန်ဆောင်ရခြင်းနဲ့ အသက်အန္တရာယ်ကို ထိခိုက်စေနိုင်တဲ့ ကိုယ်ဝန်ဖျက်ချခြင်းတွေပါ ဖြစ်စေပါတယ်။

• အကြမ်းဖက်မှုက အမျိုးသမီးတွေရဲ့ ရုပ်ပိုင်းဆိုင်ရာ ထိခိုက်ခံစားမှုတွေကို ဖြစ်စေနိုင်ပြီး အချို့အဆိုးရွားဆုံးအခြေအနေတွေမှာ အသက်သေဆုံးသည်အထိ ဖြစ်စေနိုင်ပါတယ်။

• အကြမ်းဖက်မှုက အမျိုးသမီးများရဲ့ စိတ်ပိုင်းဆိုင်ရာကို ကြီးကြီးမားမား အနာတရ ဖြစ်စေပြီး ပကတိအတိုင်း ပြန်လည်ကောင်းမွန်လာဖို့ နှစ်ကာလများစွာ အချိန်ယူ ကုစားရပါတယ်။

ဒီလိုအကြမ်းဖက်ခံရမှုတွေ လျော့ချနိုင်ဖို့ဆိုတာ အမျိုးသားများလည်း အမျိုးသမီးများနဲ့အတူ ရပ်တည်ပေးရပါမယ်။

• အမျိုးသမီးတွေနဲ့ မိန်းကလေးငယ်တွေ အကြမ်းဖက်ခံရမှုမှ ကင်းဝေးနိုင်အောင် သူတို့တွေရဲ့ ဖခင်တွေ၊ ခင်ပွန်းတွေ၊ ဦးလေးတွေ၊ အစ်ကိုတွေ နဲ့ မောင်လေးတွေကိုယ်တိုင် ပါဝင်လုပ်ဆောင်ရပါမယ်။

• အမျိုးသမီးနဲ့ မိန်းကလေးငယ်တွေနဲ့အတူ အမျိုးသားနဲ့ ယောကျာ်းလေးတွေ အတူတကွ ပူးပေါင်းပါဝင်လုပ်ဆောင်မှသာ ကျား-မ အခြေပြုအကြမ်းဖက်မှုကို ထိထိရောက်ရောက် တွန်းလှန်နိုင်မှာဖြစ်ပါတယ်။

အမျိုးသမီးများလည်း အကြမ်းဖက်ခံရမှုမှ ကင်းဝေးစွာ နေထိုင်နိုင်ခွင့်ရှိရပါမယ်။